أكتوبر 12, 2020

تصدر نتائج البحث
في البوست الأول اتكلمت عن جزء من الرانك برين وازاي بيرتب نتائج الصفحة الأولى بناءاً على سلوك المستخدم وهدفه من عملية البحث واستنتجنا ان جوجل بتهتم بالمستخدم نفسه وبتحاول تقدمله أفضل ما عندها. واحنا بالمثل كأصحاب مواقع لازم نهتم بالمستخدم نفسه ونقدمله أفضل ما عندنا.
واتكلمنا عن كيفية تصدر النتائج الثلاثة الأولى من خلال الأهتمام بـ الـ CTR – النقر مقابل الظهور و الـ Dwell time أو سلوك المستخدم المباشر بعد دخوله لموقعك والمدة اللي بيقضيها داخل الموقع وهل بيكمل بحث بعد موقعك ولا بيكتفي بموقعك لأنه بيقدم له قيمة حقيقية.
والسؤال اللي انا توقعته منكم وكتبته في البوست، فعلا أغلب الناس اللي قرأت البوست سألتني السؤال ده. وهو ازاي أأثر على سلوك المستخدم؟!
هجاوبك على السؤال ده بس في أخر البوست بإذن الله. خلينا دلوقتي نكمل كلام عن الرانك برين.
الرانك برين ده كان عبارة عن ماشين ليرننج صنعته جوجل من ٥ سنين بهدف واحد أساسي وهو فهم النية من البحث بالإعتماد على سلوك المستخدم اللي بيبحث داخل محرك بحث جوجل. والنتيجة هي اختيار افضل النتائج بناءاً على تفضيلات المستخدم.
يعني اللي انا اتكلمت عنه في البوست الأول كان النتائج. وزي اي مدرس رياضيات في الدنيا بيعلمك ١ + ١ = ٢ …
بناءاً عليها الطالب اللي فاهم بيعرف ان ١ + ٢ = ٣ و ١ + ٣ = ٤. وهكذا.
يعني بناءاً على ما تعلمته بتبدأ تطبق. بالتالي بما ان اليوزر هو الأساس انا مش بحسن لا للرانك برين ولا لبيرت ولا لجوجل نفسها … انا بحسن موقعي وصفحاتي ومقالاتي لمين؟ لليوزر نفسه.
طيب دلوقتي الرانك برين بتقول بقاله ٥ سنين! هو لسة شغال؟؟!! دي جوجل عملت تحديث بيرت BERT دلوقتي!؟
مفيش مصدر واحد بيقول ان الرانك برين ده خلاص بقى موضة قديمة! ومكانش سيرش انجن جورنال (وده موقع عملاق ع فكرة) نزل عنه مقال دليل شامل الشهر اللي فات. وثانياً مال تحديث بيرت ومال الرانك برين!
هو تحديث جوجل باندا كان لغى تحديث جوجل بنجوين؟ لا ده بيعمل حاجة وده بيعمل حاجة تانية. واحد شغال على جودة المحتوى والتاني شغال على ممارسات بناء الباك لينك.
نرجع للمهم. اليوزر نفسه.
ازاي اتصدر نتائج البحث عن طريق التأثير على اليوزر نفسه؟! ازاي اتحكم في سلوك المستخدم؟
بطريقة ساخرة: انا عايز أنيم المستخدم اللي بيبحث في جوجل مغناطيسياً وأخليه يسيب كل النتائج بتاعة المواقع المنافسة ويجي عندي انا .. ويقعد في موقعي مثلا دقيقتين ثلاثة ويتصفح أكثر من بوست كمان!
عشان نعمل كدة لازم نهتم بمجموعة عوامل محددة. بس طبعا الكلام ده بفرض انك بالفعل موجود داخل الصفحة الأولى. وعايز توصل للنتيجة الأولى وتستمر هناك أطول فترة ممكنة.
 
العامل الأول الـ CTR – أو النقر مقابل الظهور.
عشان أجبر المستخدم انه يختار النتيجة بتاعتي بالذات ويترك باقي النتائج يبقى لازم أهتم بالعنوان والوصف القصير اللي بيظهر في نتائج البحث اسفل العنوان.
يعني أكتب عنوان يشد الزائر وبنفس الوقت ميكونش عنوان مضلل. وفي أكثر من مثال للعنوان الجذاب.
  • استخدام الأرقام زي top 10 و top 5 أو اسم السنة زي 2020 مثلا
  • استخدام تون ساخر أو فكاهي أو شرير أحياناً حسب الغرض من البوست.
  • استخدام المشاعر زي الخوف أو الدهشة أو التعاطف أحيانا
  • استخدام كلمات محفزة زي: أفضل، أخطر، أجمل، فوراً، الآن، الخ…
وممكن تجرب أكثر من عنوان وتشوف الـ CTR بيعلى معاك ولا لا وهكذا.
 
بعد كدة اكتب وصف يخلي الزائر يقرر ان هو ده الموقع اللي هيديني الزتونة بتاعة الموضوع وهيجاوب كل اسئلتي. وده بصراحة تحدي كبير بالنسبة للناس اللي معندهاش موهبة الكتابة. لأن مطلوب منك في ١٦٠ حرف تقريباً انك تقنع الزائر انه يختار موقعك بدل الـ ٩ نتائج الخاصة بالمواقع الباقية في الصفحة الأولى.
طيب ايه أفضل طريقة أقنع بيها الزائر في ١٦٠ حرف انه يختار النتيجة بتاعتي!
  • تعاطف مع الزائر ووضحله انك فاهم مشكلته وأنه هيلاقي حلها بقرائته للمقال بتاعك.
  • استخدم السؤال نفسه في الوصف
  • استخدم الـ search query نفسه في الوصف
مثال كروكي كدة عالماشي …. : كيفية إعداد القهوة؟
وصف ١: لا يوجد أفضل من فنجان قهوة تم اعداده جيداً، هيا بنا نتعلم كيفية إعداد القهوة بطريقة سليمة ورائعة.
وصف ٢: هل تريد احتساء فنجان قهوة رائع ولكن لا تعلم كيفية اعدادها؟ أتفهم ذلك جيداً لذا كتبت لك أفضل وصفات عمل القهوة.
وهكذا.
ده بالنسبة لتحسين الـ CTR.
خلاص كدة احنا اصبحنا صيادين وبنعرف “نشقط” الزائر من محركات البحث 🤣🤣 باقي اننا نحبسه داخل الموقع زي أسير الحرب 😄
ازاي تحبس الزائر داخل موقعك؟
مبدئياً كدة مفيش حاجة اسمها كود يحبس الزائر في موقعك ويمنعه من الخروج .. وحتى لو وُجد الكود ده. فأنت هتخسر كتير جداً وأول حاجة هتخسرها هي سمعة موقعك.
عشان تحبس الزائر في موقعك .. لازم تهتم بأدق أدق التفاصيل. واللي بتبدأ من اهتمامك بتصميم وشكل موقعك، للمحتوى وأدق تفاصيل المحتوى والتنسيق.
وعشان متقولش عليا بقدملك كلام عايم … اليك التفاصيل.
  • اهتم جداً بعمل تصميم هادى بألوان مريحة للعين.
  • خلي دائما القائمة الرئيسية في مكان واضح وظاهر وخلي التنقل بين صفحات موقعك سهل.
  • المحتوى لوحده ممكن يكون ممل فأهتم بالتنسيق على اد ما تقدر
  • استخدم صور متعلقة بالمحتوى عشان تكسر حاجز الملل.
  • اعمل تضمين فيديو من اليوتيوب مثلاً، حتى لو الفيديو مش من انتاجك الشخصي ولا علاقة له بموقعك، المهم يكون الفيديو متعلق بالمحتوى المكتوب في الصفحة.
  • قسم المحتوى لفقرات اصغر بدءاً من سطرين لـ ٣ سطور ونصف بأقصى تقدير لكل فقرة. واستخدم عناوين داخلية محفزة وبتجاوب سؤال المستخدم.
كل دي عوامل مختصة بكسر الملل. بس مش ده كل المطلوب!
محتاج كمان في المحتوى نفسه انك تجاوب سؤال المستخدم. هو داخل موقعك عشان عنده مشكلة وحاسس انك انت اللي هتساعده في حلها. يبقى انت المفروض تقدمله الحل.
وأفضل أسلوب هنا هو انك تبدأ في المحتوى بطريقة من الأثنين دول:
أولا: “تعاطف – وعد – حل المشكلة” : يعني تتفهم احتياج المستخدم وتوضحله انك فاهم مشكلته كويس وتشرحهاله كمان، بعدها تطمنه وتوعده انه بقرائته للدليل ده أو المقال ده هيلاقي الحل النهائي لمشكلته. ودي حيلة نفسية دايما بتنجح مع المستخدم وتخليه يقرأ اخر حرف انت كتبته في المقال.
ثانيا: اسلوب “رواية قصة”: أغلب شركات الإعلانات دلوقتي بتستخدم اسلوب رواية القصة عشان تعرف الناس بمزايا المنتج واوجه الأستفادة منه وعوامل الخطر من عدم استخدامه وايه المشاكل اللي بيحلها. وده اسلوب ناجح جداً في التسويق ونفس الأمر ناجح جداً في جذب انتباه الزائر وكسر الملل.
والقصة دي ممكن تكون قصة كوميدية، شريرة، وممكن تستخدم فيها بردو المشاعر .. الخ.
المهم حاول تكون عندك ابداع … ومش شخص تقليدي.
ملحوظة: أسوأ مقال ممكن تكتبه في موقعك هو المقال اللي كل همك فيه انك تخلي اشارات يوست سيو كلها خضراء أو رانك ماث أو أو أو خاصة مع استهدافك لجملة مفتاحية مكونة من 3 كلمات أو أكثر. … بدون ما تهتم بكل اللي انا قلته.
نصيحة لوجه الله: اكتب للمستخدم مش للـ SEO ولا لجوجل.
طولت عليكم .. خالص اعتذاري. وإن شاء الله البوست الجاي هتكلم فيه عن أنواع الباك لينك وأفضلها من حيث التأثير وأفضل الأساليب.
#دردشة_سيو
#صدقة_العلم_نشره
(ملحوظة: الهاشتاجات ده مش جروب ولا صفحة .. مجرد هاشتاجات بجمع بيه البوستات اللي بكتبها وهكتبها).

About the author 

د. محمد فايق

أكاديمية سيو روكيتز تسعى لتكون أكبر مصدر تعليمي لكل ما يتعلق بفئة مشرفي المواقع، من سيو، تسويق الكتروني، كتابة محتوى، أدارة مواقع، منصات ادارة محتوى مثل الورد بريس، الخ، نكتب بشغف، ونحاول أن نقدم لك أقصى استفادة ممكنة. ونقوم دائما بتحديث معلومات مقالاتنا لتبقى مطلعاً دائما على جديد مجالاتنا.

Leave a Repl​​​​​y

Your email address will not be published. Required fields are marked

{"email":"Email address invalid","url":"Website address invalid","required":"Required field missing"}

Subscribe now to get the latest updates!