أكتوبر 16, 2020

دليل الباك لينك
إليكم أكثر الأسئلة شيوعاً وإجابة كل منهم بشكل سهل ومبسط لأبسط العقول.
يعني ايه باك لينك؟ وبيفيد في ايه في السيو؟
واي هي أفضل أنواع الباك لينك؟ وايه أفضل الأنواع من ناحية التأثير؟
ويعني ايه دومين وبيدج أوثرتي؟ وايه هو أفضل مقياس لقوة الباك لينك؟
ويعني ايه دوفولو ونوفولو؟ وتأثير كل منهم ايه؟
ويعني ايه white hat و Gray hat و Black hat؟
ويعني ايه on-page و off-page؟
وازاي ابني باك لينك بشكل سليم وبدون سبام ومجاناً كمان.
** قهوتك معاك .. واقفل بابك عليك .. وركز معايا**
((يعني ايه باك لينك وبيفيد في ايه؟))
الباك لينك في أبسط صورة ممكنة هو ان موقع غريب يحط رابط موقعك عنده في بوست أو مقال سواء رابط عادي أو رابط نصي ( رابط نصي يعني كلمة مفتاحية قابلة للنقر).
والباك لينك كان ولا يزال أهم معيار (بعد المحتوى طبعاً) جوجل بتقيس بيه قوة الموقع ومعدل ثقة مجتمع الأنترنت في موقعك وبالتالي بناءاً عليه بتديك Boost عالي يرفع ترتيبك من غياهب وظلمات صفحات محركات البحث لغاية ما توصل الصفحة الأولى.
لما موقع ما يكتب مقال وينشره ويشير لموقعك بالباك لينك على انك المصدر أو انك صاحب الفضل في كذا أو انك صاحب تريند كذا أو انك عندك منتج كذا أو خدمة كذا أو خبير في مجال كذا أو كاتب مقال عالمي ووافي وشامل ويستحق يكون مصدر لغيره. الخ.
عناكب الفهرسة لما تدخل تأرشف المقال ده بيلاقي رابط موقعك، فبيروح العنكبوت 😀😄 ده يقول لجوجل “لقيت لينك الموقع ده هنا” . فجوجل تاخد اللينك ده على انه إشارة ثقة وأن الموقع بتاعك مقدم حاجة كويسة بدليل انه كسب باك لينك على الكلمة دي (الكلمة المفتاحية).
باك لينك ورا باك لينك (وخلي بالك العدد هنا مش هو العامل المهم) تبدأ جوجل تدي لموقعك أهمية وتظهره أكثر في محركات البحث وتحطك في الصفحات الأمامية وتشوف آداء موقعك ايه. والزوار مهتمين بيه ولا لا وهكذا زي ما تكلمت عن الكلام ده في البوست اللي فات الخاص بالرانك برين وتصدر نتائج البحث.
أنواع الباك لينك:
في أنواع كتيرة للباك لينك، مش هكتب كل حاجة طبعاً … بس لو هنرتبهم حسب القوة والتأثير
١ – جيست بوست من Real money sites
٢ – جيست بوست من Private blog network – PBN
٣ – جيست بوست من مواقع بتقبل محتوى من الزوار زي Ezin articles.
٤ – جيست بوست من مدونات web.2
٥ – باك لينك من المنتديات
٦ – باك لينكات من تعليقات المنتديات
٧ – باك لينك من تعليقات المدونات
٨ – باك لينك من سوشيال بروفايلز.
رقم ١ و رقم ٢ .. أقوى باك لينك ممكن تحصل عليها لأن جوجل متقدرش تعرف اذا كنت طلبت أو اشتريت الباك لينك ده ولا حصلت عليه بدون تدخل منك. بالتالي الباك لينكات هنا بتتعامل ع انك كسبتها بدون تدخل منك. وجوجل بتحب أكثر النوع ده من الباك لينكات. وبتديله ثقة أكبر.
اما رقم ٣ و ٤ و ٥ و ٦ و ٧ و ٨ … جوجل عارفة كويس جداً انك تقدر تبني الباك لينك فيهم بنفسك بالتالي مش بتديهم نفس الثقة والأوثرتي اللي بتديهم لرقم ١ و رقم ٢.
بس طبعا مش معنى الكلام ده ان ده غلط. بالعكس ليهم تأثير. لكن مش نفس التأثير القوي في رقم ١ ورقم ٢.
وكثرة الباك لينكات اللي بتشير لموقعك من النوع رقم ٣ وحتى رقم ٨. ده مؤشر قوي جداً انك بتشتغل بشكل Spammy ووقتها بيجيلك ايميل من جوجل بتحذرك فيه 🤔وبتقولك انك شكلك كدة بتعك الدنيا 😤… ويا ريت توقف بدل ما تزعل. 😡
وشغل السبام ده عبارة عن انك تعمل عدد كبير من الباك لينكات في وقت قليل جداً وعلى عدد كلمات قليل جداً ومحدود جدااا. وفي مواقع مش متعلقة في مجالك ومن مواقع low quality. كل دي بتعتبر triggers لجوجل بنجوين Google Penguin. ولو استمريت بعد الأيميل ده، هيجيلك Penguin hit .. يعني هتتعاقب وجوجل هتقولك “امشششطططلللللعبررااااااااااا” 😆🤣🤣 ودول ٣ كلمات باللهجة المصرية “امشي اطلع برة” بس هي جوجل مؤدبة وهتقولها بشكل شيك 🤣🤣 والشكل الشيك بتاع جوجل هو انك موقع يتعاقب فعلاً.
كدة عرفنا ايه هو الباك لينك؟ وبتستفيد منه ازاي في الـ SEO وأنواعه حسب التأثير .. تعالوا بقى نتكلم عن العوامل اللي بتخلي الباك لينك مؤثر أكثر من غيره.
١- يكون من موقع متعلق بمجالك:
يعني عيب جداً ان موقعك يكون في مجال السيارات مثلا .. وتروح تعمل باك لينك في موقع بيتكلم عن الأمومة والطفولة .. الا اذا كنت بتتكلم عن سيارات بتخلف وتولد عربيات بيبي صغيرة! 😅
يبقى من أهم عوامل الباك لينك القوي انه يكون من موقع متعلق بمجالك، ومفيش مشكلة طبعا لو موقع عام بس القسم اللي فيه المقال يكون متعلق بمجالك. ونفس الأمر ينطبق على المقال نفسه.ومش محتاج أقول طبعا لازم يكون المقال نفسه متعلق بمجالك.
٢- يكون الباك لينك من مواقع ذات أوثرتي:
كلمة أوثرتي هنا مش قصدي اشير بيها لمقياس Moz. وإن كان أغلب الناس في عالم السيو والباك لينك بتقيس قوة الباك لينك بمقياس Moz (الدومين أوثرتي والبيدج أوثرتي) بس مش ده قصدي هنا. هتكلم عن المقاييس وأفضلهم وما الى ذلك بس مش في النقطة دي.
اللي اقصده هنا ان كون الموقع كبير ومشهور وجوجل بتثق فيه ومتصدر بكلمات مفتاحية كتير ومصدر ثقة وبيدخله زوار كتير. ده بيخلي الباك لينك أقوى بكثير جداً.
بس طبعا النوع ده من الباك لينك بيكون غالي جداً .. الباك لينك عموما سعره بيتحدد بناءاً على عوامل كتير وبيوصل في بعض الأحيان ل ٤ الاف دولار للينك الواحد.
٣- ان يكون الباك لينك فريد:
يعني أفضل باك لينك هو أول باك لينك في الموقع ده بمعنى ان يكون الموقع ده مخدتش منه باك لينك قبل كدة. ده بيتحسب عندك في الـ Referring domains لأن كم المواقع المختلفة اللي بتاخد منها الباك لينك أهم حتى من كم الباك لينكات اللي حصلت عليها.
وأول باك لينك دايما بتاخده من الموقع ده هو أفضل باك لينك هتاخده منه. وبردو كلامي مش معناه انك لو خدت تاني باك لينك من نفس الموقع في صفحة تانية وبـ Anchor Text مختلف انه كدة وحش أو غلط أو ملوش تأثير. لا عادي.
٤- أن يكون الباك لينك Do follow
خلينا بس متفقين ان مفيش وسم أو كود بيخلي اللينك دوفولو. بس في كود بيخلي اللينك نوفولو no-follow. وعشان نفهم الفرق بين الأثنين خليني استخدم تشبيه حلو شوية
لنتخيل ان المقال بتاعك عبارة عن بيت بداخله ٤ غرف وانت جاي تعرضه للبيع .. وGoogle bot أو عناكب الفهرسة داخلة تتفرج عالبيت ده عشان تشتريه … في غرفة من الغرف دي بابها مفتوح بالتالي جوجل بوت هيدخل يتفرج عليها ويخرج تاني .. وغرفة بابها مقفول بمفتاح .. بالتالي جوجل بوت مش هيعرف يدخل الغرفة دي .. بس هو كدة عارف ان في هنا غرفة.
الغرفة اللي بابها مفتوح دي تعتبر لينك لا يحمل اي وسم بالتالي يعتبر لينك دوفولو بالتالي فهو باب مفتوح تدخل منه عناكب الفهرسة لموقعك عشان تأرشف موقعك تاني وثالث وتمررلك الأوثرتي من الموقع اللي جايه منه، والباب المقفول ده هو يعتبر الباك لينك اللي بيحمل وسم nofollow
rel=nofolow …
الباك لينك اللي بيدخل عناكب الفهرسة عندك ده تأثيره أقوى بكتير جداً من الباك لينك اللي مقفول ومش بيدخلك عناكب الفهرسة. وبردو مش معنى كلامي ان الباك لينك النوفولو ملوش تأثير. بالعكس جوجل بردو بتعتبره باك لينك وبتشوفه على انه اشارة ثقة.
٥- أن يكون الباك لينك على رابط نصي Anchor text
يعني الكلمة المفتاحية تكون قابلة للنقر، يعني اللينك يكون على الكلمة المفتاحية. لأن الإشارة برابط نصي فيما معناها بتقول لجوجل الموقع ده جامد جدا فيما يتعلق بالكلمة دي.
وطبعا مش محتاج أقول ان الكلمة اللي في الرابط النصي تكون متعلقة بالمحتوى اللي بتشير ليه بالباك لينك. يعني مثلا متعملش باك لينك بكلمة مفتاحية مش موجودة اصلا في الصفحة اللي بتعملها باك لينك.
وبكدة نكون اتكلمنا عن الباك لينك والفائدة منه، و أنواعه وأفضل أنواعه وعرفنا ايه العوامل اللي بتخلي الباك لينك قوي وتأثيره أقوى. وايه هو النوفولو والدوفولو.
وباذن الله بكرة هتكلم عن مقياس قوة الموقع من الشركات المختلفة زي الدومين أوثرتي والبيدج أوثرتي والدومين ريتنج والـ URL ريتنج والتراست فلو وخلافه .. وهنتكلم بردو عن ازاي افحص الباك لينك وأقول ده كويس أو وحش … واذاي اشتغل شغل وايت وجراي هات سيو وابعد عن البلاك هات وايه الفرق بينهم.
ملحوظة: هكتب لكم بوست خاص عن انشاء وادارة شبكات الـ PBN. ومخاطرها وفوايدها.
————
الجزء الثاني:
الباك لينك الجزء الثاني!
 
اتكلمنا في البوست الأول عن ايه هو الباك لينك وايه فايدته للـ SEO وأكثر الأنواع شيوعاً ورتبناهم حسب الأفضلية والقوة والتأثير، واتكلمنا عن الـ dofollow والـ Nofollow والفرق بينهم وتأثير كل منهم، واتكلمنا عن اهم العوامل اللي بتخلي الباك لينك أكثر تأثيراً وقوة.
 
انهاردة هنتكلم بشكل عام شوية في أكثر الأسئلة شيوعاً عن الباك لينك واللي من خلالها هنفهم أكثر وبشكل أعمق عن الباك لينك.
————————-
سؤال: ما هو الدومين أوثرتي والبيدج أوثرتي DA- Domain authority & PA- Page Authority?
 
الدومين والبيدج أوثرتي هما مقياس من شركة MOZ لقياس قوة الموقع بناءاً على مجموعة عوامل أهمها:
– الروابط اللي بتشير لموقعك Backlinks
– المواقع اللي بتشير لموقعك Referring domains
– قوة كل موقع ونوع كل موقع من اللي بيشيروا لموقعك.
– معدل الزوار القادمين من محركات البحث Organic Traffic
– عدد الكلمات الموجودة في الصفحة الأولى Ranked Keywords
– الوقت اللي بيقضيه الزائر داخل موقعك.
– وعمر الدومين وعوامل تانية كتير.
 
والدومين أوثرتي في عالم السيو يعتبر أكثر مقياس مشهور حتى في علميات شراء وبيع الباك لينكات بس ده مش معناه انه المقياس الأفضل. في مقاييس تانية كتير لشركات أخرى أكبر من Moz وأكثر دقة من تحليلات بيانات moz. بس انا هنا مش الهدف أقولك مين أفضل من مين .. انا بس عايز اعرفك المقاييس بشكل عام.
 
شركة ahref بيعتبرها البعض انها الأكثر دقة. بس طبعا مع تجربتي الشخصية مقدرش أقول انها دقيقة جداً والدقة بتختلف في لغة من لغة ومجال من مجال … الخ.
المقياس اللي بتتعامل بيه شركة ahref على مستوى الدومين اسمه Domain rating – DR وعلى مستوى الصفحة اسمه URL Rating – UR ونفس الأمر بيعتمد التقييم على مجموعة عوامل شبيهة بالدومين أوثرتي والبيدج أوثرتي.
 
وشركة ماجيستك Majestic هي كمان عندها مقاييس خاصة اسمها Trust Flow – TF و Citation Flow – CF
وفي شركات تانية زي سيمراش وغيرها.
 
ونرجع تاني للدومين أوثرتي ..
الدومين أوثرتي مقياس من 1 إلى 100 بإعتبار 100 هو الأعلى و 1 هو الأقل فأنت أول ما تشتري الدومين جديد ومش مستخدم قبل كدة بتبدأ بدرجة واحدة فقط. ومع الوقت واكتسابك للزوار واكتسابك للباك لينك بيبدأ الرقم ده يرفع تدريجياً.
————————-
سؤال: الأوثرتي عندي وصل ل 20 ومستمر فترة مبيزيدش! ايه السبب؟؟
 
وصول الأوثرتي عندك من 1 لـ 10 بياخد وقت قليل، لكن من 10 لـ 20 بياخد وقت أكبر وجهد أكبر وشغل أكبر منك وعشان أوضح ده بشكل مبسط أكثر:
عشان توصل لأوثرتي عشرة مثلا محتاج مائة خطوة فوصول موقعك من أوثرتي عشرة لأوثرتي عشرين محتاج 300 خطوة ومن أوثرتي 20 لأوثرتي 30 محتاج 800 خطوة. وهكذا
 
وده مش مقياس نقيس بيه جودة الموقع نفسه … لكن الأوثرتي يعتبر أشهر مقياس لجودة الباك لينك. يعني ممكن جدا موقع أوثرتي 10 يكون أفضل بكثير من موقع أوثرتي 20.
 
وانت عموماً كصاحب موقع، مش شايف أهمية لإنك تهتم بمقياس الدومين أوثرتي أد ما تهتم انك تسيطر على الكلمات المفتاحية اللي في مجالك. وتتصدر بيها.
————————-
سؤال: يعني ايه القبعة البيضاء والرمادية والسوداء؟ White / Gray / Black Hat SEO؟
القبعات الثلاثة بتوصف بشكل سلس الممارسات اللي بنقوم بيها. وعشان نوضحها بشكل سريع كدة فهي كالتالي:
 
القبعة البيضاء: يعني انك تكسب الباك لينك بدون أي تدخل منك. يعني تعمل الموقع وتقدم أفضل ما عندك في المحتوى وتسيبه وربنا يتولاه برحمته بهزر طبعاً. الخلاصة انك بتعتمد فيه على جودة المحتوى وانك تقدم قيمة فعلا تخلي أصحاب المواقع ياخدوا منك كمصدر ويختارو بنفسهم يعملولك باك لينك قوي.
 
وفي حالة الوايت هات .. جوجل ومحركات البحث عموماً بيبدأوا يثقوا في موقعك لأنهم متأكدين انك كسبت الباك لينك ده بدون أي تدخل منك. وبالتالي النوع ده من الباك لينكات تأثيره بيكون قوي جداً.
 
وأشهر أمثلة على الوايت هات، هو أن موقعك يحصل على باك لينك لوحده أو انك تروح تكلم صاحب الموقع وتقوله انا كتبت مقال كويس عن كذا وانا شايف ان عندك مقال عن النفس الموضوع. ايه رأيك تحط ليا باك لينك؟
 
هنا المحادثة دي أو الأيميل ده كل الأطراف اللي فيه انت فقط وصاحب الموقع، وجوجل مش طرف ثالث فيه. بالتالي جوجل متعرفش أي حاجة عن الأتفاق ده. فهنا الباك لينك يعتبر white hat SEO وإن كان في الحقيقة هو يعتبر Gray hat SEO.
 
القبعة الرمادية: هو انك تقوم ببناء الباك لينك بنفسك وده بينقسم لنوعين. النوع الأول هو انك تبني الباك لينك عن طريق التواصل مع أصحاب المواقع وشراءه أو طلب الباك لينك منهم. والنوع ده بيظهر في عيون محركات البحث white hat SEO زي ما قلت عشان جوجل مبتكونش طرف ثالث في المحادثة أو الأيميل.
والنوع التاني زي ما اتكلمت في الجزء الأول بناء الباك لينك بإيدك في مواضيع في المنتديات وتعليقات منتديات وتعليقات مدونات وArticle directories ومدونات مجانية زي بلوجر وخلافه.
 
القبعة السوداء: وهنا الموضوع متنوع، يعني انك تعمل مثلا عدد كبير من الباك لينك الـ Low Quality بكميات كبيرة. أو انك تعمل PBN خاصة بالموقع بتاعك فقط. بدون ما تحميها بشكل كافي وتترك لجوجل Foot-Print وجوجل تقدر توصلها وتعرف انها ملكك! هنا العقاب مش بيمتد للشبكة .. ده بيوصل للموقع بتاعك
————————-
سؤال: هل لغة الموقع اللي باخد منه الباك لينك بتفرق؟
 
السؤال ده اتسأله قبل كدة جون مولر أحد مهندسي جوجل في تويتر واللي بيسأله قال “انا أكتشفت ان في موقع بلغة غير الأنجليزية عمل لي باك لينك! اتصرف ازاي؟” ورد عليه جون مولر “مش معنى أن الموقع بلغة مختلفة ان الموقع سيء والباك لينك منه سيء”.
 
انا اتكلمت بالفعل في البوست الي فات عن صفات الباك لينك القوي والأكثر تأثيراً. ومكانش من ضمنها اللغة. لأن الباك لينك غير الإعلان. يعني ايه الكلام ده؟
 
الباك لينك الهدف الرئيسي منه انه يرفع مؤشر الثقة عند جوجل لموقعك ويخليك تتصدر وتوصل للصفحات الأولى وبالتالي تحصل على زوار من محركات البحث ويمررلك الأوثرتي من الموقع اللي جاي منه الباك لينك ويتحسب في الباك لينك بروفايل في شركات زي Moz و Ahref و Semrush و Majestic.
 
وهنا الباك لينك مش هتفرق لغة الموقع ايه. لكن العيب الوحيد فقط أن لو مثلا انت موقعك عربي وفي موقع أجنبي عملك باك لينك. وجه زائر ما داخل الموقع الأجنبي ده وضغط على الباك لينك ودخل موقعك واكتشف ان المحتوى بلغة بالنسبة له غير مفهومة! هيخرج من الموقع.
 
بالتالي انت لو هتعمل اعلان نصي (اعلان ترويجي يعني) أو إعلان بصورة أو مثلا Review لمنتج معين أو خدمة معينة. مينفعش تنشره في موقع بلغة مختلفة عن لغة موقعك. لأنك كدة بتستهدف غلط. لكن كباك لينك اللغة مش مهمة.
————————-
سؤال: ايه الفرق بين الجيست بوست والـ Review؟
 
اللينك اللي هتاخده من هنا هو هو اللينك اللي هتاخده من هنا. بس الفرق هنا ان ممكن صاحب الموقع يحط وسم للرابط يخليه rel=sponsored ده فيما يتعلق بالـ SEO أما فيما يتعلق بالفرق الحقيقي بين الأثنين. أن في الجيست بوست بتاخد باك لينك على كلمة مفتاحية في مقال متعلق بمجالك. أما في الـReview المقال كله بيكون عن موقعك أو خدمة بتقدمها أو منتج بتقدمه.
————————-
سؤال: امتى أقدر أبني باك لينك لموقعي الجديد؟
 
بمجرد ما تبدأ تشوف معدل زوار كويس .. حتى لو ده تحقق من أول شهر .. تقدر وقتها تبدأ الشهر الثاني مباشرة. بس قبل ما تسأل سؤال زي ده .. تأكد تماماً وبنسبة 100% انك مقدم محتوى يستاهل يتعمله باك لينك.
 
وفي بعض المجالات بيكون صعب انك تحصل على زوار بدون باك لينك بسبب صعوبة المنافسة. بالتالي من الأفضل تنظر أول شهر ده بدون باك لينك. بعدها تبدأ بشكل تدريجي مرة لينك – مرة اثنين – ثلاثة ومش كل يوم طبعاً. بحيث تظهر في عيون جوجل بشكل natural.
————————-
سؤال: معروض عليا موقع أخباري مشهور بمبلغ وقدره! ايه رأيك؟
 
انا مبشتغلش مع مواقع إخبارية عشان محدش يتهمني اني بسوق لنفسي! بس لو انت فاتح شركة وبتقدم خدمات أو منتجات .. فاللينك من موقع كبير ومشهور وخصوصاً المواقع الإخبارية، ده هيفرق معاك كتير جداً في الـ SEO وتأثير الباك لينك هيمتد ويشمل الموقع ككل. بس المشكلة ان أغلب المواقع العربية عندهم مغالاة غير عادية في أسعار الباك لينك. وانا شايف ده استغلال بصراحة.
 
انا شخصياً لما اشوف حاجة زي كدة بشكر الشخص اللي عرض عليا العرض بشكل شيك ومهذب وبمشي .. لأن مش هدخل معاه في جدال ونقاش واضيع في وقتي ووقته وأخلق بيني وبينه عداوة وخلاص. بس انا ليا عقل أقدر أقيم بيه الباك لينك. وفي بدائل كثير اقدر اشتريها دفعة واحدة بنفس ثمن اللينك الواحد، وأقدر أوصل بيها للهدف بتاعي وبنفس الوقت هيتحسب عندي عدد referring domains أكثر وBacklinks أكثر. وده هيديني برستيج بردو في الباك لينك بروفايل بتاعي.
————————-
سؤال: الجيست بوست مدته أد ايه؟
 
مع كامل احترامي لأصحاب المواقع العربية. مفيش حاجة اسمها جيست بوست لمدة أسبوع (يعني الباك لينك يتحذف قبل ما يتأرشف!!) طيب انا هستفيد منه ايه!!! ومفيش بردو حاجة اسمها جيست بوست لمدة شهر ولمدة سنة! الجيست بوست ما دام دفعت ليه مقابل فالمفروض يفضل موجود طول ما الموقع ده أونلاين. غير كدة فالشخص الوحيد المستفيد هو صاحب الموقع اللي باع اللينك.
————————-
يعني إيه شبكة مدونات خاصة PBN – Private Blog Networks؟ واذاي انشئ شبكة PBN وإذاي أديرها؟ وإذاي أحميها وأحافظ عليها؟ وإذاي أمنع أي Foot-Print لجوجل؟ وإيه أفضل أسلوب لبناء باك لينك من الـ PBN؟ وإيه المخاطر اللي ممكن تحصل في حالة اذا جوجل عرف انها ملكي؟
 
لا السؤال ده ليه Post تاني خالص لوحده. فأصبر لبكرة بقى وأمرك لله. 😁😁
 
#دردشة_سيو
#صدقة_العلم_نشره
برعاية سيو روكيتز SEO Rockets

About the author 

د. محمد فايق

أكاديمية سيو روكيتز تسعى لتكون أكبر مصدر تعليمي لكل ما يتعلق بفئة مشرفي المواقع، من سيو، تسويق الكتروني، كتابة محتوى، أدارة مواقع، منصات ادارة محتوى مثل الورد بريس، الخ، نكتب بشغف، ونحاول أن نقدم لك أقصى استفادة ممكنة. ونقوم دائما بتحديث معلومات مقالاتنا لتبقى مطلعاً دائما على جديد مجالاتنا.

Leave a Repl​​​​​y

Your email address will not be published. Required fields are marked

{"email":"Email address invalid","url":"Website address invalid","required":"Required field missing"}

Subscribe now to get the latest updates!