أكتوبر 11, 2020

ازاي تدير موقع عام (متعدد المجالات)؟؟
أكثر سؤال بواجهه وبشكل يومي تقريباً ” انا عندي موقع فيه (عدد معين) من المقالات ومفيش زوار! ولما بدخل الموقع بكتشف انه موقع عام!
والسؤال ده ليه ألف إجابة وإجابة حسب حالة كل موقع وظروف كل موقع!
يعني مثلا في شخص فاتح موقع جينيرال بداخله أقسام تعتبر جينيرال بردو زي (الصحة – الجمال – الرشاقة – التكنولوجيا – الدين – الخ). وكل قسم في ١٠ مقالات أو أقل. وكل مقال في حدود ٥٠٠ كلمة.
وواحد تاني عامل نفس الكلام بس كل قسم في ٣-٤ مقالات. وهدفه انه يقدم في أدسنس بأسرع وقت وموقعه يتقبل. وهكذا كل موقع وليه ظروفه.
انا متفق معاك أن المواقع الجينرال تعتبر منجم ذهب بالمعنى الحرفي للكلمة.
بس ده لو اشتغلت صح.
وأغلب الناس اللي بشوفها .. تقريبا في حد ضحك عليهم وقالهم انت تعمل مدونة على بلوجر وقالب مجاني وتشتغل وهتكسب ذهب، أو تجيب قالب وردبريس واستضافة من نيم تشيب بكم دولار على دومين ب ٥ دولار ويبقى عندك موقع بأقل من ١٠٠ دولار وتشتغل بقى والفلوس هتنزل عليك زي المطر!!
فاكرين ان الموقع كل رأس ماله هو الدومين والهوست والثيم وبأقل من ١٠٠ دولار هيكون عندي مشروع ناجح! وخصوصاً الناس اللي بتفتح مواقع عامة.
كونك فتحت الموقع، فأنت اشبه بشخص اشترى محل. وقعد على بابه مستني الزباين تهل عليه من كل حدب وصوب! طيب فين البضاعة يا أستاذنا!!! الناس هتيجي على ايه! مش لازم بضاعة!
* بالتالي انت محتاج محتوى وبكميات ضخمة جداً لو فعلا مهتم أن موقعك ينجح. يعني محتاج تصرف عليه كويس عشان تشوف عائد سريع ومرضي بالنسبة لك. وده معناه انك محتاج تستثمر مبلغ مش قليل.
وموقع جينيرال نيتش صعب ويكاد يصل لمرحلة المستحيل أنك تشتغل عليه لوحدك وبنفسك. بسبب كم المجهود اللي محتاج تبذله في تخطيط الموقع من حيث المحتوى واللي بيضم تقسيم كل مجال عام زي التكنولوجيا مثلا لأقسام فرعية أصغر ومتخصصة أكثر. وعمل خطة محتوى لكل قسم فرعي. وبعدين تمسك كل مقال تخطط ليه وتبحث وتشوف المنافسين وتحللهم عشان تكتب مقال يتفوق عليهم من ناحية المحتوى.
* بالتالي أنت يا إما محتاج تعمل فريق كبير وتديرهم بشكل صحيح، أو تريح دماغك وتتعامل مع شركة كبيرة عندهم بالفعل فريق عمل يقدر يتولى المهمة دي بالنيابة عنك زي فريق كتابة المقالات ومحتوى المواقع في سيو روكيتز مثلا
مثلا.
ومش معنى انك بتنشر ١٠٠ مقال في اليوم حتي انك متهتمش بجودة المحتوى لأن لازم المحتوى يقدم قيمة للزائر وإلا عمرك ما هتتصدر بيه حتى لو قمت ببناء الف باك لينك لكل مقال. لأن في حاجة تانية بتقيم كل صفحة في موقعك حسب عوامل كتيرة .. الحاجة دي اسمها الرانك برين.
يعني مينفعش مقال المفروض يتكتب في حدود ١٥٠٠ و ٢٠٠٠ كلمة أو أكثر تيجي انت تختزله في ٥٠٠ كلمة!!
٥٠٠ كلمة في المقال متأكلش عيش في المنافسة الا اذا كنت موقع اخباري أو بتتكلم في وصفات طعام وخلافه.
بالتالي انت لازم تخطط لكل مقال وتجمع كل المحاور اللي لازم تغطيها وتنسق المقال بشكل سليم وتقدم بالفعل قيمة للقارئ.
ولما تحس ان موقعك جاهز فعلا انك تقدم لأدسنس … مغطي كل الشروط .. قدم. مش تروح تعمل موقع وتحط فيه كم مقال عشان تقدم بيه في ادسنس وخلاص!
والسؤال بتاع انا محتاج كم مقال عشان أقدم في ادسنس!! السؤال ده ملوش إجابة محددة. وبدل ما تهتم بأدسنس في البداية، اشتغل الأول وهات زوار أورجانيك واتعب على الموقع وبعدين قدم في أدسنس.
أصلا انت لو قدمت بأول ١٠ مقالات واتقبلت .. متتوقعش يجيلك ارباح مرضية قبل ما تجيب ترافيك أورجانيك عالي وتكسب زوار مهتمين بمجالك. انا أعرف أكثر من شخص اشتغل بنفس الأسلوب ده وأول ١٠٠ دولار عملهم من أدسنس كانت بعد سنة ونصف!
وأخيراً Dont be cheap … متبخلش على موقعك بحاجة هو محتاجها. ومتسترخصش. الغالي ثمنه فيه. واعمل الصح دايما والأفضل لموقعك. عشان زي ما قلت انا متفق معاك تماما ان موقع عام يعتبر منجم ذهب. لو اشتغلت عليه صح وقدمت فيه أفضل ما عندك من مال وجهد ووقت.
#دردشة_سيو

About the author 

د. محمد فايق

أكاديمية سيو روكيتز تسعى لتكون أكبر مصدر تعليمي لكل ما يتعلق بفئة مشرفي المواقع، من سيو، تسويق الكتروني، كتابة محتوى، أدارة مواقع، منصات ادارة محتوى مثل الورد بريس، الخ، نكتب بشغف، ونحاول أن نقدم لك أقصى استفادة ممكنة. ونقوم دائما بتحديث معلومات مقالاتنا لتبقى مطلعاً دائما على جديد مجالاتنا.

Leave a Repl​​​​​y

Your email address will not be published. Required fields are marked

{"email":"Email address invalid","url":"Website address invalid","required":"Required field missing"}

Subscribe now to get the latest updates!