أكتوبر 23, 2020

PBN شبكة مدونات خاصة
البوست اللي طال إنتظاره من قبل الكثير … وعن أخر قلعة من قلاع الـ SEO المحصنة. واللي انا شخصيا بسميها الـ Prime minister بتاع الـ SEO 😎
خبراء السيو بيقولوا عليها “أفضل وأسرع وسيلة للتصدر .. وبنفس الوقت أخطر وسيلة على موقعك” ونيل باتيل قال عليها: “A Penalty waiting to happen or your next best seo hack”.
لو مهتم تعرف وتقرأ شرح شامل ووافي للـ PBN – Private Blog Network من شخص قضى سنين بيدير فيها شبكات PBN فأنت في المكان الصحيح.
* ملحوظة البوست ده مش ترويج لأي حاجة *
جاهز للمخاطرة؟؟ قهوتك معاك وتعالى.
خليكم فاكرين اني لما أعلنت عن بوست الـ PBN قلت وكررت وعدت ان البوست ده للـ Advanced في #السيو .. للناس اللي ليها باع طويل في الـ SEO.
————————————————
يعني أيه PBN ؟؟
الـ PBN اختصار لكلمة Private Blog Network .. يعني شبكة مدونات خاصة. مدونات بتعملها بنفسك بهدف واحد فقط.. هو انك تحط باك لينكات لموقعك الـ Money site. عشان يتصدر بسرعة.
وبما إن الـ PBN غالباً بتتكون من Expired domains with high metrics وباك لينك بروفايل عالي بالفعل وأوثرتي عالي. وتيجي انت تشغلها بمحتوى متعلق بمحتوى موقعك. وتبدأ بعدها تزرع فيها لينكات لموقعك.
وكمان كون المواقع دي متأسسة بشكل تظهر فيه أمام محركات البحث على انها مواقع مختلفة لأشخاص مختلفين. بالتالي جوجل بتشوف اللينكات دي على انك كسبتها. بشكل طبيعي و White Hat SEO. وبالتالي انت بتتصدر بكل سهولة.
لو فاكرين سلسلة الباك لينك اللي اتكلمنا فيها عن لينكات الـ PBN اللي معمولة صح بتتعامل على انها مواقع حقيقية لناس مختلفة. لو مقرأتش سلسلة الباك لينك تقدر تشوفها كاملة على صفحتي.
اذا، عشان نفهم الموضوع كويس، الـ PBN هي عبارة عن شبكة مدونات خاصة ، بيعملها صاحب الموقع اللي المنافسة في مجاله صعبة، وبيحط فيها محتوى متعلق بالمجال بتاعه. وبعدين بيبدأ يبني لنفسه باك لينكات.
————————————————
هل الـ PBN بلاك هات أم جراي هات أم وايت هات؟؟
بما انك بتبني الشبكة دي بهدف انك تكسب باك لينكات، يبقى انت كدة شغال بلاك هات. بس البلاك هات نفسه نوعين. في بلاك هات سبام .. وفي بلاك هات اللي هو انت بتتلاعب بالنظام. وانت هنا بتتلاعب بالنظام. أو بتخدع النظام.
ملحوظة: “انا عارف اللي بيدور في راسك دلوقتي وانت بتقرأ الكلام ده. يا ريت متتسرعش في حكمك قبل ما تكمل قراءة البوست للآخر”.
ودي يمكن ناس تحسبها على انها مش حاجة كويسة انك تخدع النظام لأنك ممكن تظلم حد المفروض يتصدر عنك. بس لأن مجال الـ #SEO عموما هو أصل المنافسة. فبلاش ندعى المثالية.
لأن لو هنقارن الكلام ده بأنك تدفع أكثر في الإعلان عشان يظهر قبل المنافس .. ولما تتجسس على المنافس عشان تعرف شغال ازاي عشان تشتغل أفضل منه … ولما تقلل سعرك عشان تاخد عميل من المنافس … الخ الخ الخ .. كل ده لو ممارسات لو قارناها بعملية بناء شبكة PBN … فأعتقد ده كله يندرج تحت بند “المنافسة” واللي تقدر تعمله اعمله. “والي تكسب به العب به زي ما بيقولوا”
فبلاش ندعي المثالية. وخلينا عقلانين في الحكم شوية. واللي هيقول غير كدة انا بقولك من دلوقتي .. شوف مجال تاني عشان ده مش مجالك.
وحتى لو منافسيك بيخدعوا النظام زيك .. فده لا يزال يقع تحت مظلة الـ Black hat SEO. لكن الجانب المشرق في الموضوع .. أن جوجل مش بتشتغل في سكوتلاند يارد ولا بينها وبين ربنا عمار ومكشوف عنها الحجاب يعني!.
لذا، جوجل متقدرش تكتشف شبكات الـ PBN اللي متنفذه صح وحط ألف ألف خط وخط تحت كلمة متنفذة صح ومدارة بشكل صحيح وسليم.
بالتالي بتظهر اللينكات دي على أنها White hat وبتاخد قوة وثقة وبتخليك تتصدر فعلاً. بالتالي إجابة سؤالك هي ان الـ PBN بلاك هات لكن بتظهر وايت هات. 😉😉
————————————————
طبعا انت هنا هتسأل نفسك سؤآل .. لما الـ PBN حلوة كدة وبتخلي المواقع تتصدر بسرعة وجميلة كدة .. ايه الخطر فيها؟ وليه هي خطر؟
الـ PBN ده يعتبر الـ Advanced فيما يتعلق بالـ Off-page. ولازم اللي بيعمل الشبكة يكون بروفيشنال جداً وفاهم هو بيعمل ايه. لأن أقل أقل غلطة ممكن تكلفك الشبكة بالكامل وممكن جزء منها وممكن الشبكة والـ Money site نفسه اللي انت بتنافس بيه.
وخطورة الـ PBN هنا هو ان الشبكة يتم اكتشافها من قبل جوجل. ووقتها موقعك هيتعاقب والشبكة كمان هتتعاقب وانت شخصياً كمالك للموقع هتتحط في البلاك ليست لجوجل واي موقع ليك فيما بعد مش هيشوف النور.
– ياااااه!!! 😟😲😮😧 هو الموضوع ممكن يوصل أن اي موقع ليا فيما بعد! وكشخص كمان!
= أه، للأسف العقاب قوي من جوجل، خطأ مع خطأ جوجل بتبدأ تعرف ان انت شخص مش سوي والعلاقة بينكم أصبحت Toxic 😆😆 ومرة واحدة تلاقي نفسك ممنوع من استخدام اي حاجة متعلقة بجوجل.
هو مش ده موضوعنا دلوقتي .. بس ايوة ممكن العقاب يوصل ليك انت كشخص ولأي موقع تعمله مستقبلاً. 🤯
————————————————
– طيب دلوقتي انا تهت .. هي الـ PBN حلوة ولا وحشة؟؟!! أعملها ولا معملهاش؟؟!!
= صيغة السؤال هنا غلط تماماً … المفروض تسألني أعملها ازاي وأديرها ازاي بشكل يخليها مستحيل كشفها من قبل جوجل وبدون ما اترك أي Foot-Print لجوجل ومحركات البحث؟ وازاي افضل محافظ عليها؟؟؟
وايه هي اصلا الـ Foot-Prints اللي جوجل ممكن تعرف من خلالها الشبكة بتاعتي؟
كدة بقى احنا ندخل في الجد …
**فنجان قهوة كمان بقى ومعاه حبتين تمر عشان الطاقة والتركيز 😋.. ومتنساش تعمل حسابي معاك 😜
اي هي الـ Foot prints اللي جوجل ممكن من خلالها تعرف الشبكة بتاعتي؟
أولا بس خلينا متفقين ان جوجل مش ماشية ورانا بعدسة مكبرة. هي بس هدفها الوحيد انها تقدم افضل نتيجة للمستخدم بتاعها عشان تفضل هي أفضل محرك بحث عرفه البشرية منذ اختراع الأنترنت وحتى يومنا هذا.
بالتالي عندها مجموعة triggers بتحاول من خلالها تكشف اي ممارسات غير شرعية، أو اي محاولة للأحتيال على النظام أو خداعه.
فتأكد كدة من البداية ان موقعك بيقدم قيمة فعلا للزائر وانه يستحق انه يتصدر . بعد كدة فكر في باك لينك فكر في PBN … فكر زي ما تفكر.
الـ triggers دي يعني الزناد اللي بتدوس عليه فيضرب جرس عند جوجل انك ماشي شمال … فيجي يفحص موقعك يشوف انت شغال ازاي.
لذا قبل ما تسأل ايه هي الـ Foot prints تأكد أولا انك وانت شغال في الشبكة بتاعتك .. مبتعملش حاجة سبام وفي وقت بين كل باك لينك والتاني … ومتنشرش كل المقالات اللي فيها لينكاتك في وقت واحد في كل مواقع الشبكة.
طيب ندخل للمهم ونجاوب سؤالك .. إيه هي الحاجات اللي ممكن تكون foot print لجوجل؟؟؟
– معرف IP للموقع
– الريجسترار والـ whoIs information
– الهوست نفسه
– الـ IP بتاعك انت شخصياً
– الثيم اللي بتستخدمه في الموقع نفسه
– البلاجنز اللي بتثبتها على الموقع
– الأقسام نفسها والمقالات
– شكل الموقع وتصميمه
– معدل بناء الباك لينك اللي بتعمله لموقعك
– الباك لينك اللي بتكسبه مواقع الشبكة
– معدل النشر
هتكلم عن كل حاجة بالتفصيل باذن الله وازاي بنتخطى كل واحد فيهم وحاجات كتير اوي لسة هنتكلم عنها في الجزء الثاني باذن الله تعالى. وهنجاوب كل الأسئلة اللي هتطلع في دماغك بعد قرائتك للجزء الأول.
————————————————————————————————————————————-
سلسلة شرح إنشاء وإدارة الـ PBN – الجزء الثاني
 
قبل ما نبدأ … أحب أكرر نفس التحذير السابق اللي كتبته في الجزء الأول وفي البوست التحفيزي قبلها .. واللي رغم وجوده الا أن بعض من الأخوة الأفاضل اللي لهم خبرة وسنين في السيو، طلبوا مني تشديد التحذير عشان في ناس كتير هتتجاهل التحذير ده وهتروح تطبق بردو. وكلامهم سليم طبعاً. 🧐
 
واللي اكتشفته بأمانة بعد البوست الأول، ان ناس كتير جداً استعجلت واللي راح اشترى لينكات من PBN وجاي يقولي بص كدة انا اشتريت ده وايه رأيك … واللي بيقولي ممكن تساعدني أعمل شبكة .. واللي جاي يقولي اديني الفوت برنت بس عشان انا نويت اعمل شبكة!!!
 
وواحد المنافسة عنده ضعيفة جدااااً ومش محتاج PBN، وجاي بيقولي لو سمحت شوف موقعي كدة وقولي انا محتاج أعمل شبكة من كم موقع عشان اتصدر! 😃😃😃
 
☕️ فنجان القهوة بتاعك وحبتين تمر عشان الطاقة والتركيز ☕️
————————————————
تحذير: ☠️☠️☠️
** “الـ PBN أي نعم أسرع وسيلة لتصدر نتائج البحث .. وبنفس الوقت هو أسرع وسيلة للـ Penalty. ☠️☠️☠️ والسلسلة دي زي ما وضحت قبل كدة للـ Advanced .. للناس اللي عندها خبرة في السيو. ☠️☠️☠️ فلو انت معندكش خبرة وما اشتغلتش في الـ PBN قبل كدة، من فضلك متجربش حاجة. عالأقل اصبر لما تشوف باقي السلسلة وتعرف انت محتاج ايه! ومحتاج لها اصلا أو لا”. ☠️☠️☠️ لأن الـ PBN الغلطة فيها بتزعل. وانا مش عايزك تزعل، انا عايزك تنجح.**
 
كفاية جماجم كدة 😀 ولا ازود كمان شوية؟ ☠️☠️☠️☠️
 
اتكلمنا في الجزء الأول عن ايه هي الـ PBN وإيه هي فوائدها وأضرارها وعوامل الخطورة فيها … وهل هي White hat SEO ولا Gray ولا Black … انهاردة المفروض كنا هنتكلم عن عوامل الخطورة كلها بالتفصيل وتفاصيل الـ Foot Prints وكيفية تخطيه. وكيفية انشاء PBN بشكل سليم بدون أي نسبة خطأ.
 
لكن بعد اللي شفته والرسايل اللي وصلتني. أعتقد انا محتاج أوضح أكثر بعض الأمور .. هبدأ معاكم بسؤال .. لمين الـ PBN؟ لإيه؟ ولماذا؟؟؟
 
قبل ما نبدأ .. يشهد الله ان الكلام اللي هيتكتب هنا مفيش اي غرض تسويقي منه، عشان الناس اللي قالتها قبل كدة بهزار أو بجد. والهدف الأول والأخير والوحيد من سلسلة الـ PBN هو هدف تعليمي لا أكثر أو أقل. وفي سلاسل علمية كتير جاية باذن الله.
————————————————
لمين ؟؟ ولإيه .. وليه اصلا PBN؟ ليه مش وسيلة تانية مثلا ؟أو الـ SEO التقليدي مثلا؟
 
عشان أجاوب على السؤال ده، خليني احكيلكم حدوتة كدة 😀 مين فينا مش بيحب الحواديت! 😅
 
في يوم من الأيام كنت شغال في شركة تسويق أجنبية مع فريق أجنبي ومن ضمن الخدمات خدمة السيو .. جالي شخص عربي مقيم بالخارج قالي انا عندي موقع إنجلش شغال أفيليت لشركات الفوريكس باللغة الإنجليزية من ٤ سنين وعندي كلمات في الصفحة الأولى بس خسرتها بسبب المنافسة الشرسة.
 
بعد مراجعة مجاله والمنافسة والمنافسين وتحليلهم اكتشفنا ان المنافسين تقريباً مشطبين على كل مصادر الباك لينك وعندهم حرفياً لينكات من فوربس والتايمز وصانداي وكل المواقع التقيلة وعدد الباك لينكات فوق 350 الف باك لينك وعدد الـ Referring domains من الفين لغاية ٣ الاف وكسور.
 
انا شفت الكلام ده حسيت برهبة شوية وقلت احنا خسرنا العميل… ورحت قلتله كدة بالنص “الموضوع ده مهم بالنسبة لك؟ ممكن تفكر تغير المجال مثلاً وتشوف حاجة تانية؟ لأن المنافسة عندك مفيهاش مجال، وعشان تعرف تنافس هتحتاج ثروة”
 
ورد عليا وقتها بسكرين شوت لأرباحه لما كان متصدر ببعض الكلمات وليس كلها، وكانت ارباحه في المتوسط الـ ٣٢ – ٣٥ الف دولار. رجعت انا للفريق اللي شغال معاهم عشان نشوف حل للمنافسة دي. وطلعنا بحل اننا نعمل شبكة PBN من الف موقع زودناهم فيما بعد لـ ألفين موقع عشان نعلى على المنافسين من ناحية الـ Referring domains. وقبل ما تقول ألفين موقع كتير أو رقم مبالغ فيه. الراجل ده كنا مقترحين عليه اننا نعمل مجموعة مواقع Money sites منافسة. بحيث بدل ما ينافس بموقع واحد، ينافس بمجموعة مواقع
 
وفي خلال سنتين كنا خسرنا منهم ١٨٢ موقع فقط بسبب أخطاء من العميل ونتيجتها كان ١٨٢ موقع اتعاقبوا واتعملهم Deindex.
 
وكمان معتمدناش فقط على الشبكة، احنا كمان اشترينا باك لينكات من مواقع كبيرة جداً. عشان نغطي عامل الـ reffering domains.
 
الأستنتاج:
 
– الـ PBN خيار اساسي في المنافسة الشرسة والصعبة. ومش اي حد محتاج PBN … فلازم قبل ما تفكر فيها تسأل نفسك كدة محتاجلها أو لا؟ وتعمل تحليل ROI – Return of investement، يعني العائد من الأستثمار.
 
– الـ PBN لن تغنيك عن السيو التقليدي والباك لينك العادي. ولازم يكون عندك تنوع في مصادر الباك لينك.
 
– الشبكة ممكن ترفع بيها أكثر من موقع مش موقع واحد فقط. وموضوع انك تبني منها باك لينك لموقع واحد فقط ده يعتبر footprint.
 
– الغلطة في الـ PBN ممكن توصلك ان جوجل تعاقب بعض أو كل مواقع الشبكة وضيف عليهم ان موقعك في خطر. و ١٨٢ موقع كانت خسارتهم كبيرة على الراجل ولو مكناش لحقناه كان الموضوع هيكبر ويكبر والوضع كان هيكون كارثي.
 
– انت بتجاهد وتعافر عشان تدير موقعك أو موقعين أو 3 حتى ومش حاطط في بالك الحذر وحاسب كل خطوة عشان ماشي صح .. ما بالك لما تدير شبكة PBN أياً كان عددها باسلوب معين وبحذر … وخصوصاً لما تكون مش خبير أو مش عارف. ده ممكن يوقعك في اخطاء. وأكبر شركات الـ SEO عموماً عاملين سيستم برمجي يديروا بيها الشبكة عشان يحافظوا عليها من الأخطاء البشرية. وده هنتكلم فيه فيما بعد بإذن الله.
 
– متشتريش PBN من مواقع الفريلانسر .. ولا من شخص عادي.. لأن انت متضمنش بيديرها ازاي وبيتعامل معاها ازاي!!! وحصلت كتير وسمعت كتير في فترة من الفترات ان جوجل نفسها تبعت موظف من عندها يدخل يشتري لينكات من PBN من فايفر وياخدوا التقرير يتعقبوا كل روابط الشبكة ويعاقبوا كل المواقع اللي فيها بالـ de-index.
 
وفي الفترة دي كان فوربس نفسه بيبيع لينكات في فايفر بـ ٩٩٩ دولار للينك .. والخدمة دي اتقفلت بعدها. وأي بلاغ صغير لجوجل ان موقع فلان الفلاني بيبيع لينكات … بيخلي الموقع عرضة للـ Penalty.
 
فالمواقع اللي بتعرض بيع لينكات أو أصحابها بيحطوها في أماكن زي فايفر وخلافه أو تجمعات لبيع اللينكات زي شركات السيو اللي عاملة متجر للباك لينك والجيست بوست وبتعرض فيه المواقع بأسمائها ولينكاتها. الناس دي كلها معرضة للـ Penalty.
 
وشركات السيو الكبيرة عاملة شبكات كبيرة بتساعدها في تصدر مواقع عملائها .. والكلام ده محدش هيقولهولك ولا شركات السيو دي نفسها هتقوله أو تعلن عنه. ويعتبر ده الجزء اللي بيتقال عليه أنه “#أسرار_السيو” .. وبيخفوه عن العامة وأصحاب المواقع والعملاء.
 
وانا مش أحسن منهم ولا هدعي المثالية … انا عامل شبكات بردو وبدير شبكات PBN من سنين. واللي يعرفني كويس عارف الكلام ده. وأعتقد ان الناس القديمة في السيو هنا عندها شبكة PBN عالأقل ولو من ٥ مدونات فقط عالأقل.
 
كفاية رغي كدة بقى .. وندخل في المفيد …. هرد على شوية استفسارات الأول بس.
————————————————
 
الـ PBN – Private blog network لمين وليه؟
 
– لشخص المنافسة عنده متوسطة فما فوق.
– لشخص محتاج عدد كبير من الباك لينك.
– لشخص محتاج يشتغل على عدد كبير من الكلمات المفتاحية.
– لشخص عنده أكثر من موقع في مجالات متعلقة ببعض.
– لشخص عنده أكثر من موقع في مجالات مختلفة وهيحتاج يعمل شبكة جينيرال.
– لـشركة SEO عندها عملا كتير ومنافسات متعددة حسب عملائها ومجالات عملائها .. وفي الحالة دي الشركة دي محتاجة شبكات متخصصة وشبكات جينيرال. الخ.
– لشخص عنده خبرة في إنشاء وإدارة الشبكة والحفاظ عليها. وده بيتطلب وقت وجهد كبير.
– لشخص عايز يبيع لينكات نظيفة وبشكل نظيف. وعلى فكرة الـ PBN في عالم السيو بيسموه بيزنس المليون دولار. 🤑🤑🤑
————————————————
 
عندي موقع في كذا وعامل موقع تاني بعمل منه باك لينكات للأول؟ هل دي فيها مشكلة؟؟ خصوصاً اني الموقعين بحساب واحد في السيرش كونسول!
 
بص مبدأياً عشان تقول انك عندك شبكة PBN فمش أقل من ٣ مدونات. وهنتكلم لاحقاً في تفاصيلهم الإنشاء والإدارة والفوت برنت وخلافه. لكن لإجابة سؤالك لازم نوضح هنا نقطة مهمة.
 
هل كل موقع منهم بيقدم حاجة مختلفة؟ يعني جوجل مثلا عندها Gmail – درايف – يوتيوب … الخ. بس كل موقع منهم بيقدم حاجة مختلفة. فهل انت بتقدم حاجة مختلفة في كل موقع؟ لو لا .. مجرد مدونة الهدف منها باك لينكات ومش بقدم حاجة فيها ذات قيمة. وبحساب سيرش كونسول واحد .. كدة انت شغال غلط.
 
لكن لو مثلا عندك متجر للكتب بتبيع فيه كتب، وعندك مدونة منفصلة باسم مختلف وبتكتب فيها ريفيوهات عن الكتب وحاطط فيها لينك للمتجر لصفحة شراء الكتاب في كل ريفيو .. هنا الموضوع عادي ومحدش يقدر يلومك. بما ان مدونة الريفيوهات بتقدم قيمة للزائر .. وموقع المتجر بيقدم خدمة بيع الكتب. عادي.
 
عايز اقولك جوجل نفسه عنده PBN بس بشكل صايع شوية. مدونة واحدة لكل خدماته. وبعض موظفيه لكل واحد فيهم مدونة خاصة بيه والكل بيسوق لمين؟ لجوجل وخدماتها 😅😅 بس طبعا جوجل مش محتاجة PBN عموما. عشان محدش يحسب الكلام ده عليا 😆🤣
————————————————
 
ممكن اعمل PBN على بلوجر عشان أوفر شوية في الفلوس؟؟
 
من الناس اللي قرأت البوست الأول واستعجلت ودخلت كلمتني .. كان ده سؤالهم.
 
في الواقع لو افترضنا انك هتعمل الشبكة بدومينات مدفوعة مش دومينات Blogspot بتاعة بلوجر … (مع ان اللي سأل كان بيسأل عشان يعمل بدومينات بلوجر نفسها 🧐)، فأنت بردو هتحط كل الدومينات على بلوجر وده يعتبر Foot Print … لأن اول حاجة تعتبر footprint هي الهوست نفسه.
 
ولو هتشتغل بدومينات بلوجر نفسها، فأنت كدة مش عامل PBN، انت كدة بتعمل web2 … وده جوجل بتشوفه gray hat seo وأرجع لشرح الباك لينك عشان تفهم الفرق بين الأثنين.
 
وبما انك عايز توفر شوية فلوس فأنت محتاج تعرف الأول انت محتاج ايه تحديداً؟! عشان تشوف هتوفر منهم فلوس ازاي!.
————————————————
 
محتاج ايه عشان أبدأ في الـ PBN؟؟
 
– محتاج تقرأ السلسلة دي .. وتبحث وتعرف وتقرأ مصادر ثانية وتتعلم كويس قبل ما تبدأ وبعد كدة محتاج تعرف شوية تفاصيل عن الـ Footprint وازاي تتخطاه. لأن اهتمامك بإخفاء أثار اقدامك هو اللي بيعمل الفرق بين الموقع العادي والموقع في شبكة الـ PBN.
 
طيب ايه هي الـ Footprint بالتفصيل عشان اتخطاها؟؟
 
الـ Footprints هي بالعربي كدة أثار الأقدام اللي لو حد مشي وراك وتتبعها هيعرف انت فين وماشي ازاي. فأحنا عايزين نخبي آثار أقدامنا من محركات البحث عشان نفضل محافظين على الشبكة بتاعتنا ونحميها كويس.
 
ودي قائمة بآثار أقدامك اللي عايزين نمسحها … اقلع الشوز بتاعك بقى 🙃 واتهد شوية كدة واقعد ركز معايا. 😁😁
 
*** 🔍🔍👇👇👇👇👇👇👇🔍🔍 ***
🔍 بيانات الدومين WhoIs Information
 
لازم كل دومين يكون ببيانات مختلفة ويفضل Registrar مختلف. وخدمة whoIs Protection اصلا بالنسبة لجوجل زي ما قل أحد ممثليها من قبل .. استخدام اصحاب المواقع لخدمة حماية بيانات صاحب الدومين فيه نوع من الريبة والشك، ليه تخفي هويتك إلا لو بتعمل حاجة غلط؟؟
 
فلو هنعمل شبكة من 3 لـ 5 لـ 10 مواقع، مش هتخسر حاجة لو سجلتهم من registrar مختلفين بأسماء وإيميلات وهمية وتحط الحسابات دي كدة في ملف عندك على الجهاز وفيه كل ايميل وباسورد لكل حساب. عشان متنساش حاجة.
 
أما لو انت shark كبير وهتعمل شبكة من 50 و 100 و 1000 موقع فما فوق وعايز توفر شوية … وأصلا مفيش 1000 ريجيسترار … هتعمل ايه؟ هتجيب شوية من هنا معاهم الـ WhoIs protection المجاني من نيم تشيب مثلاً .. على شوية من جودادي بإيميلات مختلفة .. على شوية من Name بإيميلات مختلفة.. وهكذا.
 
*** 🔍🔍👇👇👇👇👇👇👇🔍🔍 ***
🔍 الاستضافة وما يتعلق بها Host & IP & name servers etc
 
مينفعش اطلاقاً تحط كل مواقع الشبكة على هوست واحد ولا VPS وتشتري IP مختلف لكل موقع … انت حرفياً محتاج هوست مختلف لكل مدونة وIP مختلف لكل مدونة لأن لازم يكون في تنوع في الهوست.
 
والموضوع هنا بيحتاج حد فاهم وتيكنيكال شوية، لأن لازم التنوع ده يمتد ليشمل الـ IP بتاع الموقع والـ name servers والـ A records والـ MX records وما إلى ذلك.
 
*** 🔍🔍👇👇👇👇👇👇👇🔍🔍 ***
🔍 منصات إدارة المحتوى CMS’s
 
لو انت دولفين صغير وهتعمل 3-5-10 مدونات … عادي ممكن تعملهم كلهم من خلال منصة إدارة محتوى واحدة زي الووردبريس .. وإن كان التنوع حلو بردو ومطلوب.
 
أما لو إنت اخطبوط وعايز 50 – 100 موقع … أو Shark وعايز 300-500 موقع .. أو حوت كبير وناوي تبلع السوق بـ 1000 موقع فما فوق. فمهم جداً انك تنوع الـ CMS’s .. يعني شوية wordpress شوية joomla … الخ. لأن الـ CMS يعتبر footprint لجوجل.
 
*** 🔍🔍👇👇👇👇👇👇👇🔍🔍 ***
🔍 بلوك للـ SEO Bots
 
الكلام ده مش فوت برنت أد ما هو غلاف كدة للحماية، يعني تعمل بلوك في الشبكة بالكامل لمواقع زي Moz – Ahref – سيمراش وماجيستك وغيرهم. الكلام ده لمواقع الشبكة نفسها.
 
وممكن كمان تعمل ده لمواقع الـ Money sites بس زي ما هتمنعه عن غيرك هتمنعه عن نفسك. يعنى انت مش هتعرف تستخدم المواقع دي لتحليل موقعك لو عملت بلوك فيه للـ SEO Bots. والبلوك ده بيتعمل من خلال ملف الروبوت Robot.txt
 
*** 🔍🔍👇👇👇👇👇👇👇🔍🔍 ***
🔍 القالب والبلاجنز Themes and plugins
 
سواء جوملا أو ووردبريس، الأثنين فيهم قوالب وفيهم بلاجنز … فأنت حاول لما تعمل شبكة PBN متستخدمش نفس القالب مرتين، لأن القالب والبلاجنز يعتبر فوت برنت لجوجل.
 
لو عندك كمية مواقع كثير في الشبكة .. ممكن تكرر قالب واحد مرتين .. بس البلاجنز تختلف. ومع ذلك حاول على أد ما تقدر متكررش القوالب. ونوع في البلاجنز .. يعني مثلا موقع بتستخدم فيه يوست سيو .. استخدم في التاني رانك ماث، وفي الثالث all in one والرابع سيو بريس وهكذا …
 
وأحلى ما في الووردبريس عموما أن البلاجن الواحدة ليها أكثر من ٥ – ٦ بدائل. يعني الكاش مثلا عندك w3 total – super cash – wp rocket – الخ. ونفس الكلام في جوملا والـ CMS’s التانية بردو بس مش زي الووردبريس.
 
*** 🔍🔍👇👇👇👇👇👇👇🔍🔍 ***
🔍 السيرش كونسول وأناليتكس وأدسنس
 
انا عارف ان انتوا ناس عقلاء 😆😆 ومش هتعملوا الحركة دي وتحطوا الشبكة بتاعتكم كلها على حساب جوجل واحد وأدسنس واحد… بس والله شفت ناس عاملينها 😂😂😂
 
ارحموا من في الأرض يرحمكم من في السماااااء … بنقول آثار أقدام وانتوا رايحين تبلغوا جوجل بنفس ذات نفسه .. وتقوله المواقع دي كلها ملكي 😂😂😂😂 مرارتي هتتفقع
 
بس لو مصمم عايز تكسب من أدسنس من الشبكة أو عالأقل خالص تتابع احصائيات وتفاصيل كل موقع .. مفيش مشكلة لو خليت الموظفين عندك وأختك وأخوك وابن عمك وابن خالتك وجوز ابن عم ابن خالة اختك يعملوا حساب ادسنس كل واحد فيهم ويتعمل الموقع باسمه. زي ما جوجل موظفينها عندهم مدونات.
 
ومع ذلك انت ممكن تحصل على احصائيات وافية لكل موقع لو استخدمت سيستم إدارة بـ API أو برمجت انت بنفسك سيستم إدارة.
 
*** 🔍🔍👇👇👇👇👇👇👇🔍🔍 ***
🔍 عامل مواقع الـ PBN كأنك بتعامل موقع Money site
 
يعني ايه الكلام ده؟ يعني صفحة من نحن .. ايميل مثلا info@sitename والثاني Admin@sitename وهكذا لكل المواقع ونوع اسم الأيميل مرة info. مرة admin مرة Ahmed .. مرة عبعال .. كدة يعني. وممكن تربط الأيميلات دي كلها فيما بعد بحيث تعمل forward أوتوماتيكياً لأيميل تخصصه انت للـ PBN.
 
ومتنساش صفحات السياسات .. ولوجو محترم كدة ابن ناس .. خلي كل موقع يظهر في عيون جوجل كأنه موقع حقيقي.
 
*** 🔍🔍👇👇👇👇👇👇👇🔍🔍 ***
🔍 تشابه الأقسام في المدونات
 
انت مثلا عندك موقع عن عمليات زراعة الشعر … وعايز PBN. فتقعد تخطط كدة ٥٠ موقع … كل موقع فيه الأقسام ( وصفات تنعيم الشعر – وصفات تطويل الشعر – عمليات زراعة الشعر – العناية بالشعر ) “مثلا – مجرد مثال للتوضيح” وتروح تاخد كل الأقسام دي نسخ لصق في الـ ٥٠ موقع كلهم!!!
 
طيب نحلها ازاي؟ واحد مثلا من غير اقسام .. مجرد مدونة عن الشعر، وواحد مثلا فيه قسمين أو ثلاثة .. الثاني فيه اقسام مختلفة .. الثالث في اقسام مختلفة .. الرابع في الأقسام اللي عملتهم في الموقع الأول بس باسم مختلف أو صياغة مختلفة .. وهكذا.
 
*** 🔍🔍👇👇👇👇👇👇👇🔍🔍 ***
🔍 الكتابة في المدونات
 
هنمسك موقع واحد على سبيل المثال من الشبكة كلها: مقال كبير وحلو ومعاه شوية صغيرين ومقال كبير حلو ومعاه شوية صغيرين … وهكذا! يعني ابعد عن موضوع الـ ٣٠٠ و ٤٠٠ و ٥٠٠ كلمة … الكلام ده مبيأكلش عيش والله! وجوجل عايزة تشوف موقعك حقيقي … فإديها قيمة للناس.
 
يعني انشر مقالات حلوة ١٠٠٠ و ١٥٠٠ كلمة و ٢٠٠٠ كلمة وحاول تستهدف الكلمات اللي معدل البحث عليهم 10 – 100 شهرياً. عشان احنا عايزين المواقع دي تتصدر بـ ١٠٠ كلمة مثلا من اللي المنافسة فيها سهلة جداً. وده كله هيرفع معاك الـ Money site وهيعود عليك انت بالنفع غير انه يظهر بشكل طبيعي.
 
وخلي مواعيد النشر متنوعة .. متكتبش المقالات مثلا وتنشرها كلها دفعة واحدة في الشبكة كلها! عشان مواعيد النشر الثابتة تعتبر فوت برنت لجوجل.
 
ومش هتخسر حاجة لو حطيت شوية Rich media في مقالات الشبكات! يعني صور Featured، تضمين فيديوهات من الـ YouTube مثلا. .. الخ.
 
*** 🔍🔍👇👇👇👇👇👇👇🔍🔍 ***
🔍 نشر الباك لينكات
 
نوع الكلمات المفتاحية .. يعني متمسكش كلمة واحدة تنشرها كلها في كل المواقع في وقت واحد.
 
يعني قسم كلماتك .. الشهر ده مثلا هعمل كامبين على ١٠ كلمات مفتاحية مختلفة. مروحش انشر في كل موقع ١٠ مقالات وكل مقال فيه كلمة من العشرة! لا .. غلط!!
 
انشر كلمة في موقع وكلمة ثانية في موقع ثاني وكلمة ثالثة في موقع ثالث .. وكلمة رابعة في موقع رابع وهكذا … وبعد كدة يا سيدي كرر نفس الكامبين بس بدل المواقع. وبعد كدة كرر الكامبين وبدل المواقع. وهكذا.
 
الشبكة بتاعتنا يعني ومحدش بيجري ورانا… ولا إيه؟!
 
*** 🔍🔍👇👇👇👇👇👇👇🔍🔍 ***
🔍 سرية شبكة الـ PBN
 
سواء هتبيع لينكات منها أو هتشتغل بيها لعميل عندك لو عندك شركة يعني، أو هتشتغل بيها برايفت لشغلك انت والـ Money sites بتاعتك انت. متعرفش حد خالص بيها. ولا حتى مراتك 😆😆 لأنها ممكن تبلغ عنك لو زعلتها أو قررت تتجوز عليها 😂😂😂
 
داري على شمعتك تبيض 🐣🥚 😂😂
 
طولت عليكم.. تقبلوا اعتذاري. والبوست الجاي ان شاء الله عن كيفية إنشاء PBN وباقي الأستفسارات اللي اتعرضت عليا من الجزء الأول والجزء الثاني اللي هو انت بتقرأه حالياً …
 
#دردشة_سيو #SEO #السيو
#صدقة_العلم_نشره
برعاية سيو روكيتز SEO Rockets
————————————————————————————————————————
تابع المقال ده هيتحدث بشكل يومي. 

About the author 

د. محمد فايق

أكاديمية سيو روكيتز تسعى لتكون أكبر مصدر تعليمي لكل ما يتعلق بفئة مشرفي المواقع، من سيو، تسويق الكتروني، كتابة محتوى، أدارة مواقع، منصات ادارة محتوى مثل الورد بريس، الخ، نكتب بشغف، ونحاول أن نقدم لك أقصى استفادة ممكنة. ونقوم دائما بتحديث معلومات مقالاتنا لتبقى مطلعاً دائما على جديد مجالاتنا.

Leave a Repl​​​​​y

Your email address will not be published. Required fields are marked

{"email":"Email address invalid","url":"Website address invalid","required":"Required field missing"}

Subscribe now to get the latest updates!